« »

မသမာသော အေဂျင်စီများကို နာမည်ပျက် စာရင်းသွင်းရန် မလေးရှားသံရုံး စီစဉ်နေ

မသမာသောနည်းလမ်းများ အသုံးပြု၍ ဗီဇာလျှောက်ထားခြင်း နှင့် အခြား အလွဲသုံးစားမှုများ ပြုလုပ်ပါက ကုမ္ပဏီနာမည်သာမက ဝန်ထမ်းအားလုံးကိုပါ နာမည်ပျက် စာရင်းသွင်းကာ တရားဝင် ထုတ်ဖော် ကြေညာရန် မလေးရှားသံရုံးမှ စီစဉ်နေကြောင်း ကျောက်တံတား မြို့နယ်ရှိ အေဂျင်စီတစ်ခုမှ တာဝန်ရှိသူတစ်ဦးက ပြောသည်။

လက်ရှိတွင် မလေးရှားသံရုံး၌ Black List သတ်မှတ်ထားသော ကုမ္ပဏီ ၃ခုရှိနေပြီး တရားဝင်ထုတ်ဖော် ကြေညာရန် ပြင်ဆင်နေကြောင်း ၄င်းကပြောသည်။

"အရင်ကလည်း ဒီလို Black Listလုပ်ထားတဲ့ ကုမ္ပဏီတွေ သံရုံးမှာပဲ အသိပေး ကပ်ထားတတ်တယ်။ အခုက မရတော့ဘူး။ မရိုးမဖြောင့် လုပ်တဲ့ကုမ္ပဏီဆိုရင် MD ကအစရှိသမျှ ဝန်ထမ်းအားလုံးကို အမည်ပျက် စာရင်းသွင်းမယ်။ သံရုံးမှာလည်း ကပ်ထားမယ်။ အလုပ်သမား ညွှန်ကြားမှု ဦးစီးဌာနနဲ့ သက်ဆိုင်ရာ ဌာနတွေကိုလည်း အကြောင်းကြားမယ်။ အဲဒါအပြင် မလေးရှား အစိုးရနဲ့ အေဂျင်စီ တွေကိုလည်း စာရင်းပို့မယ်လို့ ပြောတယ်။ ဘာမှ ဆက်လုပ်ခွင့် မရှိတော့ဘူးပေါ့”
ဟု ၄င်းကဆိုသည်။

မလေးရှားသံရုံး အနေဖြင့် ၂ဝ၁၁ ခု၊ သြဂုတ်လ ၂၆ ရက်တွင် လိုင်စင်ရ အေဂျင်စီများအား ဖ်ိတ်ကြား၍ အပြောင်းအလဲ လုပ်သွားမည့် လုပ်ငန်းစဉ်များနှင့် ပတ်သက်၍ ရှင်းလင်းရာ၌ ယင်းကဲ့သို့ ပြောကြား ခဲ့ခြင်းဖြစ်ကြောင်း သိရသည်။ ပြည်တွင်းရှိ မလေးရှား အလုပ်အကိုင် ရှာဖွေရေး အေဂျင်စီ အချို့မှာ ၂ဝ၁၁ ခု၊ မတ်လအတွင်း KDM အတုများဖြင့် ဗီဇာရယူကာ မလေးရှားသို့ လုပ်သား စေလွှတ်သည့် အမှုများ ပေါ်ပေါက်ခဲ့ပြီး နောက်ပိုင်း မလေးရှား သံရုံးအနေဖြင့် စည်းမျဉ်းများ ပြောင်းလဲ ဆောင်ရွက်ခဲ့ရာ ယခုအခါ ပိုမို တင်းကြပ်လာခြင်း ဖြစ်ကြောင်း ၄င်းကဆိုသည်။

၎င်းအပြင် သံရုံးရှိ ဝန်ထမ်းဦးရေကို တိုးမြှင့်သွားမည်ဖြစ်ပြီး အေဂျင်စီများ၏ မသမာမှုများနှင့် အခက်အခဲ များကို မည်သူမဆိုတိုင်ကြားနိုင်ကာ သံရုံးနှင့်ပတ်သက်၍ သိလိုသည် များကိုလည်း တိုက်ရိုက် တွေ့ဆုံ မေးမြန်းနိုင်ကြောင်း သိရသည်။

"သူတို့က အခု ဗီဇာလျှောက်တဲ့ အခါမှာလည်း မမှန်မကန် လုပ်စားလာကြတော့ အားလုံးကို စနစ်တကျ စိစစ်ကိုင်တွယ်သွားဖို့ အစီအစဉ် ချလာတယ်။ နောက်တစ်ခုက လာဘ်ပေးလာဘ်ယူ မှုတွေကိုလည်း ခွင့်မပြုဘူး။ လာဘ်ထိုးတာတွေ၊ လက်ဆောင် ပစ္စည်း ပေးတာတွေကိုလည်း လုံးဝမလုပ်ဖို့ တားမြစ်ထားပါတယ်”
ဟု ရှင်းလင်းပွဲ တက်ရောက်ခဲ့သော အထက်ပါ ပုဂ္ဂိုလ်က ပြောသည်။

၎င်းအပြင် အေဂျင်စီများနှင့် အပတ်စဉ် တွေ့ဆုံရန် စီစဉ်ထားပြီး မလေးရှား သံရုံးအနေဖြင့် လက်ခံ ရရှိသည့် တိုင်ကြားမှုများကို စီအိုင်ဒီ အဖွဲ့နှင့် ပုံမှန်တွေ့ဆုံကာ စစ်ဆေး အရေးယူ သွားမည်ဖြစ်ကြောင်း သိရသည်။

Source : Popular News
Tags: ,

လမ်းသစ်

လမ်းသစ်ဂျာနယ် အင်တာနက်စာမျက်နှာအား www.lannthit.co.nr ဖြင့်ဝင်ရောက် ဖတ်ရှုနိုင်ပြီး နေ့စဉ်သတင်းစာအား www.burmanews.co.nr ဖြင့်ဝင်ရောက် ဖတ်ရှုနိုင်ပါသည်။