« »

လမ်းသစ်အမြင် (၅-၁၉)

၁၉၆၂ ခုနှစ်မှစ၍ တစ်ပါတီ အာဏာရှင်စနစ် ကျင့်သုံးခဲ့သော အစိုးရ၏ အကျင့်ပျက်မှုများကြောင့် နိုင်ငံ၏ စီးပွားရေး၊ ပညာရေး၊ ကျန်းမာရေး အဘက်ဘက်မှ ကျဆင်းလာသောအခါ ပြည်သူတွေ အကြပ်အတည်းကို ဆန္ဒဖော်ထုတ်ရင်း ၁၉၈၈ ခုနှစ်တွင် လူထုဆန္ဒဖြင့် ဒီမိုကရေစီကို ကျင့်သုံးရန် တောင်းဆိုခဲ့ ကြသည်မှာ ယနေ့ဆိုလျှင် ၂၃ နှစ်ပင် ကြာခဲ့ပေပြီ။ နှစ်တွေလတွေ ကြာမြင့်လာသောကြောင့် တိုင်းပြည်ရော ပြည်သူပါ ဆိုးကျိုးတွေနဲ့ ရင်ဆိုင် ကြုံတွေ့ နစ်နာခဲ့ရသည်။ နိုင်ငံလည်း အဘက်ဘက်မှ ယိုယွင်းပျက်စီးပြီး ချိနဲ့လာသည်။ အိမ်နီးချင်း နိုင်ငံကြီးများ၏ ဝါမြိုမှုကို ခံစားရပြီး ပြည်သူတွေလည်း နိုင်ငံတကာတွင် ကျွန်ခံနေရပြီး စိတ်ဓာတ်ပိုင်း ဆိုင်ရာတွေ ပျက်စီး၍ ပညာရေး၊ ကျန်းမာရေး၊ စီးပွားရေး၊ လူမှုဆက်ဆံရေးနှင့် ယဉ်ကျေးမှု၊ ဘာသာရေး အဘက်ဘက်တွင် နိမ့်ကျနေသည်။

မြန်မာပြည်သူတွေ ဒီမိုကရေစီစနစ်ကို တောင်းနေခြင်းမှာ လူသားပီပီသသ လူလိုသူလို နေထိုင်ပြီး ကမ္ဘာနှင့် ရင်ဘောင်တန်းနိုင်ရန် ဖြစ်သည်။ မြန်မာပြည်တွင် စစ်မှန်သော ဒီမိုကရေစီစနစ် ကျင့်သုံးနိုင် ရန်မှာ အစိုးရသစ်၏ စိတ်ရင်းစေတနာ ဘယ်လောက်ရှိသလဲဆိုသည့် အပေါ်မှာ အဓိကမူတည်နေသည်။ ပြည်သူလူထု ဘက်ကတော့ အစိုးရသစ်အဖွဲ့က တကယ် စေတနာမှန်နဲ့ ပြည်သူအကျိုး၊ တိုင်းပြည်အကျိုး အတွက်ဆောင်ရွက်လျှင် တိုင်းပြည်အရေးအတွက် လက်တွဲပါဝင်ဖို့ အမြဲတမ်း အသင့်ဖြစ်နေသည်။ မြန်မာအစိုးရက ပြည်သူတွေ ယုံကြည်မျှော်လင့်သော ဒီမိုကရေစီ စနစ် လက်ခံမကျင့်သုံးခြင်းမှာ ပြည်သူတွေရဲ့ ဘဝတိုးတက်ပြီး လူပီပီသသ လူလိုသူလို နေထိုင် စားသောက်မှုကို မလိုလား၊ မမြင်ချင် သောကြောင့်ဟု ပြည်သူတွေဘက်က သုံးသပ် မြင်နေကြသည်။ လက်ရှိအရပ်ဝတ်လဲ အစိုးရသစ်ကလည်း ဘယ်လိုပုံစံနဲ့ အုပ်ချုပ်ရေး အာဏာဆက်ခံခဲ့တာလဲ ဆိုတာ ကမ္ဘာကရော၊ မြန်မာပြည်သူတွေပါ သိရှိထားပြီး ဖြစ်သည်။

ထို့ကြောင့် ကမ္ဘာနဲ့ ပြည်သူလူထုရဲ့ အထူးသတိထား စောင့်ကြည့်ခြင်းကို ခံနေရသည်။ အစိုးရသစ်က အပြောင်းအလဲ တွေကို အရိပ်ပြသလိုလို မီဒီယာတွေကနေ စကားအဖြစ် ဝါဒဖြန့် ပြောဆိုနေသော်လည်း လက်တွေ့တွင် ပြည်သူအကျိုး၊ တိုင်းပြည် အကျိုး ဘာမှထူးထူးခြားခြား မလုပ်ပြနိုင်သေးပေ၊ ယခင်အစိုးရ များနဲ့ ထူးခြားစွာ ခြားနားခြင်း မရှိပေ။ ဒီမိုကရေစီစနစ် ပေါ်ထွန်း ကျင့်သုံးရေး ပြည်သူလူထု အဆင်ပြေစွာ နေထိုင် စားသောက်နိုင်ရေးနှင့် တိုင်းပြည် အနာဂတ်ရေးအတွက် ပြည်သူတွေကတော့ တောင်းဆို တင်ပြနေရဆဲပါ။

ယခုအစိုးရ လက်ထက်တွင် ဒီမိုကရေစီ စနစ်ကျင့်သုံးရေးအပြင် မြန်မာပြည် ကမ္ဘာမြေပုံပေါ်တွင် အင်္ဂါရပ်များနဲ့အညီ တည်ရှိ နေစေရန် မြန်မာနိုင်ငံသားများ၏ အသက်သွေးကြော၊ မြန်မာနိုင်ငံ၏ သဏ္ဍာန်သရုပ်ကို ပေါ်လွင်လှသော ဧရာဝတီမြစ်ကြီး မပျောက်ကွယ်ဘဲ သဘာဝအတိုင်း ပုံမှန် တည်ရှိ စီးဆင်းနေနိုင်ရန်ကိုပါ ပြည်သူတွေ ဆန္ဒပြတောင်းဆိုမှုက အစိုးရသစ်လက်ထက် တိုးတက်လာမှုလား?

လမ်းသစ် အဖွဲ့သားများ
(၂၀၁၁ခုနှစ် အောက်တိုဘာလ (၁)ရက်နေ့ထုတ် လမ်းသစ်ဂျာနယ် အတွဲ ၅ - အမှတ်စဉ် ၁၉ မှ။)

Tags: ,

လမ်းသစ်

လမ်းသစ်ဂျာနယ် အင်တာနက်စာမျက်နှာအား www.lannthit.co.nr ဖြင့်ဝင်ရောက် ဖတ်ရှုနိုင်ပြီး နေ့စဉ်သတင်းစာအား www.burmanews.co.nr ဖြင့်ဝင်ရောက် ဖတ်ရှုနိုင်ပါသည်။